مدارس اور جدیدتعلیم کا امتزاج:دینی مدارس میں عصری علوم کے ادغام کی اہمیت ، چیلنجز اور عملی اقدامات

Abstract

دینی مدارس اسلامی تہذیب و تمدن کے تسلسل، فکری تشکیل اور مذہبی اقدار کے تحفظ میں ایک ناقابل ِانکار کردار کے حامل ادارے رہے ہیں۔ برصغیر میں اسلامی تشخص کے تحفظ اور مسلم عوام کی دینی ضروریات کی تکمیل کے لیے ان اداروں نے ایک عظیم علمی روایت قائم کی ہے۔ تاہم عصرِ حاضر میں علم کی وسعت ، سماجی پیچیدگیوں ، سائنسی انقلاب ، ٹیکنالوجی کی پیش رفت اور فکری تیز رفتاری نے علمی و تربیتی اداروں کو ایک نئے دوراہے پر لاکھڑا کیا ہے جہاں محض دینی علوم کی تعلیم جدید دنیا کے چیلنجز سے عہدہ برآ ہونے کے لیے کافی نہیں رہی۔ اسی تناظر میں دینی مدارس کے نصاب و نظام میں عصری و سائنسی علوم کا ادغام ایک اہم علمی و فکری ضرورت بن چکا ہے۔ زیر نظر خلاصہ اسی علمی ضرورت کی وضاحت ، اس سے وابستہ چیلنجز کے تجزیہ اور اس ضمن میں ممکنہ اصلاحی اقدامات کی نشاندہی کے لیے ترتیب دیا گیا ہے تاکہ علمی و تحقیقی سطح پر ایک مربوط و متوازن فہم پیش کیا جا سکے۔ تحقیق کا آغاز اس سوال سے ہوتا ہے کہ دینی مدارس کی موجودہ ساخت اور نصابی تشکیل کس حد تک عصر حاضر کے تقاضوں کو پورا کرنے کی صلاحیت رکھتی ہے اور کیا مدارس میں عصری علوم کی شمولیت ممکن، مفید اور شرعی حدود میں رہتے ہوئے قابل ِ قبول ہے؟ اس حوالے سے تحقیق میں نہ صرف مدارس کے تاریخی و نظریاتی پس منظر کو بنیاد بنایا گیا ہے بلکہ موجودہ عالمی تناظر میں مسلم معاشروں کی تعلیمی محرومی، فکری تنزلی اور سائنسی عدم پیش رفت کو بھی زیر بحث لایا گیا ہے۔ تحقیق کا مقصد مدارس اور جدید تعلیم کے امتزاج کے لیے ایک ایسا فکری اور عملی خاکہ مہیا کرنا ہے جو مدارس کے اصل مقصد کو برقرار رکھتے ہوئے انہیں عصرِ حاضر کے فکری و سائنسی میدانوں میں مؤثر کردار ادا کرنے کے قابل بنا سکے۔موضوع کی اہمیت اس بات سے بھی اجاگر ہوتی ہے کہ مدارس پاکستان میں کروڑوں طلبہ کی دینی و اخلاقی تربیت کے مراکز ہیں اور اگر ان اداروں کو جدید تعلیم کے دھارے سے جوڑ دیا جائے تو نہ صرف تعلیمی خلیج ختم ہو سکتی ہے بلکہ علمی تفریق ، سماجی طبقاتی تقسیم اور فکری محدودیت بھی بتدریج کم کی جاسکتی ہے۔ ایسے فارغ التحصیل طلبہ جو قرآن و سنت سے مزین ہونے کے ساتھ ساتھ سائنسی و سماجی علوم سے بھی بہرہ ور ہوں، وہ نہ صرف دینی قیادت کے اہل ہوں گے بلکہ ریاستی اداروں ، بین الاقوامی تعلقات ، سماجی فلاح و بہبود اور سائنسی تحقیق جیسے شعبوں میں بھی قابل اعتماد کردار ادا کر سکیں گے۔ یہی وہ ہم آہنگی ہے جو ایک صالح ، باشعور اور ترقی یافتہ اسلامی معاشرے کی بنیاد بن سکتی ہے۔اس موضوع پر تحقیق پر اشد ضرورت اس لیے بھی محسوس کی گئی کہ مدارس کو ایک مخصوص دائرہ کار تک محدود کردینے کا نتیجہ یہ نکلا ہے کہ دینی تعلیم کے حامل افراد کو عملی زندگی میں فکری ہم آہنگی ، پیشہ ورانہ مہارت اور عصری تقاضوں کے ساتھ مطابقت پیدا کرنے میں شدید دشواری کا سامنا ہوتا ہے۔ اس کا نتیجہ یہ نکلتا ہے کہ دینی طبقہ معاشرے میں یا تو غیر مؤثر رہتا ہے یا جدید علمی حلقوں میں ان کی بات کو قبولیت نہیں ملتی ۔ لہٖذا اس تحقیق کے ذریعے اس خلا کو پر کرنے اور مدارس کو علمی وسعت عطا کرنے کی سنجیدہ کوشش کی گئی ہے۔تحقیق کی حدود میں اس امر کا خیال رکھا گیا ہے کہ پاکستان کے اندر موجودہ دینی مدارس کے نظام، ان کے نصابی ڈھانچے ، طلبہ کی تعلیمی ضروریات، اساتذہ کی اہلیت اور ادارہ جاتی ساخت کو ہی مرکزِ تحقیق بنایا گیا ہے. منہج تحقیق میں بیانی ، تجزیاتی اور تجویزی اسلوب کو اختیار کیا جائے گا۔ مدارس کے نصابی ارتقا، عصری علوم کی تاریخی حیثیت، اسلامی تعلیمات میں دنیاوی علوم کی اجازت و ترغیب ، جدید تعلیمی نظریات ، موجودہ پاکستانی دینی تعلیمی ڈھانچے اور مدارس کے منتظمین ، اساتذہ و طلبہ کے انٹرویوز اور آرا کی بنیاد پر نتائج اخذ کیے جائیں گے۔ اس کے ساتھ ساتھ مدارس و جامعات کے تعامل کے حوالے سے بعض تجزیاتی ماڈلز اور ان کی کامیابی و ناکامی کا تجزیہ بھی تحقیق کا حصہ بنایا جائے گا۔آخر میں نتائج اور سفارشات پیش کی جائیں گی۔